यी सबै गन्हाएका मोजाहरु हुन्
गन्हाइए पनि धुँदै लाउँदै‚ लाउँदै धुँदै
यी भारतबाट हुत्याइएका‚
यी चाइनाबाट लत्याइएका
उतापट्टी विशिष्ट पाहुना बस्ने कक्षमा
बेलायतबाट मुन्ट्याइएका
माथिपट्टी महामहिमहरुको भेलामा
सबै धकेलिएका र गलहत्याइएकाहरु
यी सबैले पालैपालो चलाइरहेका
मेरो देशको सरकार ।
उसको नीति र नियममा
चलिरहेको चिडियाघरको अढाइ करोड प्राणी
आफ्नो अधिकार र विकासको कुरा गर्दै
वल्लो र पल्लो गुफा चहार्दा
चल्न नसक्ने गरी दाम्लोले जेलिएको
नेल र ठिंगुरो ठेलिएको
भन्नलाई सरकारको नागरिकता पाएको
मेरो सात पुस्ता जस्तै मर्दै बाँच्दै गरेको
म एक नेपाली‚ नेपाल जेलभित्र ।
(मितिः २०६९ मङ्सिर १९ गते‚ २०६९)
No comments:
Post a Comment
तपाईँलाई यो सामग्री कस्तो लाग्यो ? कृपया कमेन्ट गर्नुहोस् ।